ग्लोबल आईएमई बैंकले दशैंको अवसरमा ‘ग्लोबल आईएमई बैंकको साथमा दशैं रमाईलो’ भन्ने स्लोगन सहित विभिन्न डिजिटल कारोबारहरुमा छुट तथा नगद फिर्ता (क्यास ब्याक) योजनाहरु सार्वजनिक गरेको हो ।
बैंकको डेबिट तथा क्रेडिट कार्ड बाहक ग्राहकले आफैलाई आवश्यक सामान खरिद गर्दा बैंकको कार्ड प्रयोग गरी पीओएस मेसिनबाट भुक्तानी गर्दा ३ सय रुपैयाँदेखि ५ सय रुपैयाँ सम्मको नगद फिर्ता (क्यास ब्याक) हुने बैंकले जनाएको छ ।
यस नगद फिर्ता योजना मार्फत बैंकको डेबिट तथा क्रेडिट कार्ड बाहक ग्राहकहरुले योजना अवधिभर कम्तीमा १ हजार रुपैयाँको ३ वटा कारोबार गरेमा ३ सय रुपैयाँ तथा ५ वा सोभन्दा बढी पटक कार्डको प्रयोग गरी भुक्तानी गरेमा ५ सय रुपैयाँको नगद फिर्ताबाट लाभान्वित हुने छन् । यो योजना २८ असोजदेखि ७ कात्तिकसम्म लागु हुनेछ ।
बैंकले आफ्नो मोबाइल बैंकिङ प्रयोगकर्तालाई लक्षित गरी छुट योजना पनि सार्वजनिक गरेको छ । यस योजना अन्तर्गत बैंकका मोबाईल बैंकिङ प्रयोगकर्ताहरुले आफूलाई आवश्यक समानहरु खरिद गर्दा क्यूआर कोड स्क्यान मार्फत भुक्तानी गर्दा ‘DASHAIN’ प्रोमो कोड प्रयोग गरी आफ्नो खरिद मूल्यमा तुरुन्तै १० प्रतिशत वा अधिकतम ३ सय रुपैयाँसम्मको नगद छुट पाउने छन् । यो योजना २८ असोजदेखि ७ कात्तिकसम्म लागु हुने बैंकले जनाएको छ ।
बैंकले आफ्ना ग्राहकहरुलाई चुस्त दुरुस्त समयमा सेवा दिनका लागि सेवामा समय समयमा परिस्कृत गर्दै बिभिन्न अवसरहरुमा अफरहरु समेत प्रदान गर्दै आएको छ ।
