काठमाडौँ । अमेरिकी राष्ट्रपति डोनाल्ड ट्रम्पले ट्रम्पआरएक्स नामक सरकारी वेबसाइट सुरु गरेका छन् । ट्रम्पले यो प्लेटफर्मले अमेरिकीहरूलाई किफायती औषधिहरू पहुँच गर्न र स्वास्थ्य सेवा लागत घटाउन मद्दत गर्ने दाबी गरेका छन् ।
ह्वाइट हाउस कम्प्लेक्समा वेबसाइट अनावरण गर्दै ट्रम्पले भने- ‘तपाईंले धेरै पैसा बचत गर्नुहुनेछ। यो सम्पूर्ण स्वास्थ्य सेवा प्रणालीको लागि पनि राम्रो छ ।’
ट्रम्पआरएक्सले औषधिहरू सिधै बेच्दैन । यसले क्लियरिङ्गहाउसको रूपमा काम गर्ने र प्रयोगकर्ताहरूलाई औषधि कम्पनीहरूको वेबसाइटहरूमा रिडिरेक्ट गरेपछि उनीहरूले औषधिहरू किन्न सक्ने बताइएको छ । यसले खुद्रा फार्मेसीहरूमा प्रयोगको लागि कुपनहरू पनि प्रदान गर्दछ ।
सुरुवातमा, प्लेटफर्ममा ४० भन्दा बढी औषधिहरू समावेश थिए । यसमा लोकप्रिय तौल घटाउने औषधिहरू ओजेम्पिक र वेगोभी समावेश छन्, जसको मूल्यहरू अमेरिकामा लामो समयदेखि बहस भइरहेको छ ।
यो पहल यस्तो समयमा आएको छ, जब मुद्रास्फीति र जीवनयापनको लागत अमेरिकामा एक प्रमुख राजनीतिक मुद्दा बनेको छ । नोभेम्बरमा हुने मध्यावधि चुनाव अघि बढ्दो औषधि, स्वास्थ्य सेवा, आवास, भाडा र किराना सामानको मूल्यलाई रिपब्लिकन पार्टीको लागि प्रमुख चुनौती मानिन्छ ।
ट्रम्पले औषधि अनुदान औषधि कम्पनीहरूमाथि उनको व्यक्तिगत दबाबको परिणाम भएको बताएका छन् । उनले अमेरिकीहरूले लामो समयदेखि औषधिको लागि बढी तिर्दै आएको तर्क गर्दै उही औषधिहरू अन्य देशहरूमा सस्तोमा उपलब्ध रहेको बताए ।
ट्रम्पले अमेरिकामा औषधिको मूल्य कम हुँदा कम्पनीहरूले अन्य देशहरूमा मूल्य बढाउन सक्ने बताउदै संसारलाई अनुदान दिदा थाकेको बताए ।
ट्रम्पले पहिलो पटक सेप्टेम्बरमा ट्रम्पआरएक्सको उल्लेख गरेका थिए । उनले औषधि कम्पनीहरूसँग १५ भन्दा बढी सम्झौताहरू भएको बताउदै जसको उद्देश्य संयुक्त राज्य अमेरिकामा औषधिको मूल्य विकसित देशहरूमा सबैभन्दा कम दरमा ल्याउनु रहेको स्पष्ट गरे ।
ट्रम्पआरएक्सको सुरुवात धेरै पटक स्थगित गरिएको थियो । गत वर्ष, सेन्टर फर मेडिकेयर एण्ड मेडिकेड सर्भिसेजका प्रमुख मेहमेट ओजले वेबसाइट वर्षको अन्त्यसम्ममा सुरु हुने बताएका थिए, तर जनवरीको योजनाबद्ध सुरुवात पछि स्थगित गरिएको थियो ।
