काठमाडौँ । पश्चिमी अमेरिकामा यस वर्ष हिउँको मात्रा असाधारण रूपमा घटेको छ भने तापक्रम सामान्यभन्दा धेरै बढेको छ । यस अवस्थाले आगामी महिनाहरूमा गम्भीर पानी अभावको खतरा बढाउनुका साथै वन डढेलोको जोखिम पनि उच्च बनाएको वैज्ञानिकहरूले चेतावनी दिएका छन् । हिउँमा आधारित पर्यटन र शीतकालीन खेलकुदसमेत यसबाट प्रभावित भएका छन् ।
वैज्ञानिकहरूका अनुसार पछिल्ला केही दशकयताकै सबैभन्दा कम हिउँको मोटाइ र फैलावट यस वर्ष देखिएको छ । ६७ वटा मौसम केन्द्रमा डिसेम्बरदेखि फेब्रुअरीको सुरुआतसम्म असामान्य रूपमा उच्च तापक्रम रेकर्ड गरिएको छ ।
सामान्यतया यस समयमा करिब ४ लाख ६० हजार वर्ग माइल क्षेत्रमा हिउँ जम्ने गर्दथ्यो, जुन क्षेत्रफल क्यालिफोर्निया, युटा, आइडाहो र मोन्टाना चारवटै राज्य बराबर हो । तर यस वर्ष हिउँ केवल करिब १ लाख ५५ हजार वर्ग माइल क्षेत्रमा मात्र सीमित भएको छ, जुन क्यालिफोर्निया राज्य बराबरको क्षेत्रफल हो ।
नेशनल स्नो एन्ड डाटा सेन्टर (एनओएए) ले यसअघि यस्तो जाडो कहिल्यै नभएको बताउदै मौसमको ढाँचा लामो समयदेखि अस्वाभाविक रूपमा एउटै दिशामा चलिरहेको उल्लेख गरेको छ । केन्द्रका वैज्ञानिक जेसन गर्लिचका अनुसार ओरेगनमा हिउँभित्र संचित पानीको मात्रा रेकर्डकै न्यून स्तरमा पुगेको छ, जुन अघिल्लो सबैभन्दा खराब अवस्थाभन्दा पनि ३० प्रतिशत कम हो ।
अमेरिकाको पूर्वी भागमा भने कडा जाडो र बाक्लो हिउँ जमेको छ, तर पश्चिमी भागमा अवस्था ठीक उल्टो देखिएको छ । युटाको वेस्ट जर्डन सहरमा मानिसहरू टी–सर्ट र सर्ट्स लगाएर हिँडिरहेको देखिएको छ ।
हिउँको अभावका कारण स्की रिसोर्टहरू पहिले नै समस्यामा परेका छन् । ओरेगन, कोलोराडो र युटामा सन् १९८० यताकै सबैभन्दा कम हिउँ रेकर्ड गरिएको छ । जनवरी महिनाभर अत्यन्तै सुख्खा मौसम रह्यो, धेरैजसो राज्यमा औसतभन्दा आधा वा त्योभन्दा पनि कम वर्षा भएको छ। घाम बढी लाग्नु र तापक्रम उच्च रहनुका कारण हिउँ जम्नै सकेन।
डिसेम्बरमा परेको भारी वर्षाका कारण क्यालिफोर्नियाको अवस्था अन्य राज्यको तुलनामा केही राम्रो देखिएको छ । यद्यपि सॉल्ट लेक सिटी विमानस्थलमा लगातार ३२७ दिनसम्म एक इन्च पनि हिउँ नपरेको रेकर्ड बनेको छ, जुन सन् १८९०–९१ पछि पहिलो पटक हो । कोलोराडो र युटामा हिउँ कम हुँदा कोलोराडो नदी क्षेत्रमाथि सबैभन्दा बढी असर पर्ने देखिएको छ ।
