काठमाडौँ । इरानको राजधानी तेहरानमा रहेका इन्धन भण्डारण केन्द्रहरूमा इजरायलले आक्रमण गरेको छ । इजरायली सेनाले तेहरानमा रहेका धेरै इन्धन भण्डारण परिसरलाई लक्षित गरेर आक्रमण गरिएको जनाएको हो ।
इजरायली सेनाले इरानी सरकारले यी इन्धन भण्डारण केन्द्रहरूलाई सैनिक संरचना सञ्चालन गर्न प्रत्यक्ष र निरन्तर रूपमा प्रयोग गरिरहेको दाबी गरेको छ ।
यसअघि इरानको फार्स समाचार संस्थाले पनि तेहरानमा रहेको एक तेल भण्डारण केन्द्रलाई निशाना बनाइएको खबर सार्वजनिक गरेको थियो ।
यसैबीच, सामाजिक सञ्जालमा सार्वजनिक गरिएको एक भिडियोको पुष्टि गरिएको छ । उक्त भिडियोमा तेहरानको आकाशमा ठूलो आगोको लप्का उठिरहेको देखिन्छ । तर अहिलेसम्म यस आक्रमणमा कसैको ज्यान गएको छ वा छैन भन्ने विषय स्पष्ट भइसकेको छैन ।
