आगामी सन् २०२४ मा आयोजना हुने आईसीसी टी–२० विश्वकप क्रिकेट प्रतियोगितामा छनौट चरणको खेलको लागि एसियाली मुलुकका आठवटा राष्ट्र सोमबारदेखि नेपालका दुईवटा रंगशालामा क्रिकेट खेलको प्रतिस्पर्धा गर्दै छन् । आज छनोट प्रतियोगिताको पहिलो दिन सोमबार चारवटा खेल हुने भएका हुन् ।
कीर्तिपुर मैदानमा एकै समयमा नेपाली समयअनुसार बिहान ९ बजे नेपाल र सिंगापुर बीच र मुलपानी क्रिकेट मैदानमा बहराइन र यूएईबिच दोस्रो अर्को खेल हुनेछ । यसैगरी आजै नेपाली समयअनुसार, दिउँसो १ः१५ बजे कीर्तिपुर मैदानमा मलेसिया र ओमानबिच तेस्रो खेल र सोही समयमा मुलपानी क्रिकेट मैदानमा हङ्कङ र कुवेत बीच चौथो खेल हुनेछ ।
आगामी टी–२० विश्वकपका लागि एसियाली क्षेत्रको यो अन्तिम छनोट प्रतियोगिता हो । यो प्रतियोगिताबाट दुईवटा राष्ट्र आगामी टी–२० विश्वकपमा छनोट हुनेछन् । आईसीसी टी–२० विश्वकपको नवौँ संस्करण सन् २०२४ मा वेस्ट इन्डिज र अमेरिकाले संयुक्त रूपमा आयोजना हुँदैछ ।
एसियाली क्षेत्रको अन्तिम चरणको छनोट प्रतियोगितामा आयोजना नेपालसहित संयुक्त अरब इमिरेट्स (यूएई), हङ्कङ, ओमान, बहराइन, कुवेत, मलेसिया र सिंगापुरको सहभागिता रहनेछ । प्रतियोगिता खेलहरू कीर्तिपुरस्थित अन्तर्राष्ट्रिय क्रिकेट मैदानमा र मुलपानी क्रिकेट मैदानमा खेलाइनेछ ।
दुई समूहमा विभाजित खेलमा प्रतियोगिताको समूह ‘ए’ मा आयोजक राष्ट्र नेपाल, मलेसिया, ओमान र सिंगापुर रहेका छन् भने समूह ‘बी’ मा भने बहराइन, हङ्कङ, कुवेत र यूएई रहेका छन् । प्रारम्भिक चरणमा आफ्नो समूहमा रहेका चारवटै टोलीले एकअर्कासँग एक–एक खेल खेल्ने छन् । त्यसपछि दुवै समूहबाट तालिकाको पहिलो र दोस्रो स्थानमा रहने टोली प्रतियोगिताको सेमिफाइनल चरणमा प्रवेश गर्ने छन् ।
प्रतियोगिताको सेमिफाइनलमा समूह ‘ए’ को विजेताले समूह ‘बी’ को उपविजेतासँग तथा समूह ‘बी’ को विजेताले समूह ‘ए’ को उपविजेतासँग प्रतिस्पर्धा गर्ने छन् । प्रतियोगिताको दुवै सेमिफाइनल खेल कात्तिक १७ गते खेलिनेछ । सेमिफाइनल खेलमा सफलता हात पार्दै फाइनलमा पुग्ने दुवै टोली सन् २०२४ मा आयोजना हुने टी–२० विश्वकपका लागि छनोट हुने छन् । प्रतियोगिताको फाइनल खेल कात्तिक १९ गते कीर्तिपुर क्रिकेट मैदानमा खेलाइनेछ ।
