काठमाडौँ । नेपालको हङकङ चाइनासँग हुन लागेको अन्तराष्ट्रिय मैत्रीपूर्ण खेल स्थगित भएपछि अखिल नेपाल फुटबल संघ (एन्फा) र राष्ट्रिय खेलकुद परिषदबीच जुहारी चलेकोले छ ।
एन्फाले राखेपले दशरथ रंगशालाको स्वीकृति नदिएका कारण खेल स्थगित भएको सूचना प्रकाशित गरेसँगै खेलकुद परिषदले नियमित प्रकृया पुराएर खेल आयोजना गर्नेगरि स्वीकृति प्रदान गरिएको जानकारी जनाएको थियो ।
तर एन्फाले सोमबार अर्को विज्ञप्ति जारी गर्दै राखेपले समयमा स्वीकृति नदिएका कारणले खेल हुन नसकेको दाबि गरेको छ ।
एन्फाका प्रवक्ता सुरेन्द्र शाहले विज्ञप्तिमा चैत ८ गते बिहान १०:३० बजेदेखि अपराह्न १२:३० बजेसम्म एन्फाका कर्मचारी राखेप कार्यालयमा उपस्थित रहँदा समेत कुनै लिखित स्वीकृति पत्र प्रदान नगरिएको बताएका छन् ।
एन्फाले भनेको छ :
अखिल नेपाल फुटबल संघ (एन्फा) को आयोजनामा आगामी २०८२ चैत १२ गते (२६ मार्च २०२६) का दिन फिफा विन्डो अन्तर्गत हङकङको राष्ट्रिय टोली र नेपालको राष्ट्रिय टोलीबीच दशरथ रं गशालामा सञ्चालन हुने तय भएको अन्तर्राष्ट्रिय मैत्रीपूर्ण फुटबल खेलको व्यवस्थापन तथा स्वीकृतिसम्बन्धी विषयमा उत्पन्न परिस्थितिप्रति यस संघको गम्भीर ध्यानाकर्षण भएको छ । यस सम्बन्धमा यथार्थ वस्तुस्थिति स्पष्ट पार्न यो प्रेस विज्ञप्ति जारी गरिएको छः
१- उक्त खेल सञ्चालनका लागि आवश्यक स्वीकृति तथा दशरथ रंगशाला उपलब्ध गराइदिन यस संघले मिति २०८२/११ / १० मा च.नं. ९११-०८२-८३ मार्फत राष्ट्रिय खेलकुद परिषद् (राखेप) लाई पत्राचार गरेको थियो, जुन मिति २०८२ / ११ / ११ मा दर्ता नं. ३५५९ अनुसार दर्ता भएको थियो । सोही पत्रमार्फत मैदान मर्मत सम्भारका लागि समेत अनुमति माग गरिएकोमा कुनै लिखित स्वीकृति प्राप्त हुन सकेन ।
२- स्वीकृति प्राप्तिका लागि एन्फाका जिम्मेवार पदाधिकारी तथा कर्मचारीहरूले पटक-पटक राखेपका सम्बन्धित अधिकारीहरूसँग ताकेता गर्दा पनि लामो समयसम्म कुनै लिखित जवाफ प्राप्त हुन सकेन ।
३- उक्त जानकारीअनुसार हिजो चैत ८ गते बिहान १०:३० बजेदेखि अपराह्न १२:३० बजेसम्म एन्फाका कर्मचारी राखेप कार्यालयमा उपस्थित रहँदा समेत कुनै लिखित स्वीकृति पत्र प्रदान गरिएन ।
४. दशरथ रंगशालाको मैदान मर्मत सम्भार, फ्लड लाइटको इन्धन, कर्मचारी भत्ता, स्कोर बोर्ड सञ्चालनमा खटिने जनशक्ति लगायत सम्पूर्ण आर्थिक तथा प्राविधिक दायित्व एन्फाले नै वहन गर्दै आएको अवस्थामा पनि खेल सञ्चालनका लागि समयमै आधिकारिक स्वीकृति प्राप्त नहुनु अत्यन्तै दुःखद विषय हो ।
५- अन्तर्राष्ट्रिय खेलको तयारीका लागि अत्यन्त सीमित समय बाँकी रहेको र राखेपबाट समयमै आधिकारिक लिखित स्वीकृति प्राप्त नहुँदा सिर्जित अनिश्चितताका कारण एन्फा सचिवालयले हङकङ फुटबल संघलाई जानकारी गराई उक्त खेल हालका लागि स्थगन गरिएको सूचना सार्वजनिक गरिसकेको छ । एन्फाले खेल स्थगनको सूचना जारी गरिसकेपछि राखेपले ‘स्वीकृति प्रदान गरिसकेको’ भनी प्रेस विज्ञप्ति सार्वजनिक गरेकोप्रति एन्फा आश्चर्यचकित छ । चैत ५ गते जारी गरिएको पत्र ( चलानी नं ५८४/०८२/०८३) लाई चैत ८ गते मात्र सार्वजनिक गर्नु राखेप प्रशासनको नियतमाथि प्रश्न उठाउने विषय हो । यस्ता गतिविधि पुनः नदोहोरियोस् भनी सतर्क रहन तथा राखेपजस्तो निकायले एन्फामाथि दोषारोपण गर्नुको सट्टा आफ्नो प्रशासन चुस्त-दुरुस्त राखी, यस्तो गलत नियत राख्ने कर्मचारीमाथि आवश्यक कारबाही गर्न एन्फा आग्रह गर्दछ । हालसम्म एन्फालाई आधिकारिक वा लिखित स्वीकृति प्राप्त नभएको तथ्य यसै विज्ञप्तिमार्फत स्पष्ट पार्न चाहन्छौँ । अन्त्यमा, राष्ट्रिय गौरव तथा अन्तर्राष्ट्रिय सम्बन्धसँग प्रत्यक्ष रूपमा जोडिएको यस्ता संवेदनशील खेलमा सम्बन्धित निकायको प्रशासनिक ढिलाइका कारण उत्पन्न असहज परिस्थितिप्रति सम्पूर्ण खेलप्रेमी नेपालीहरूसँग हामी क्षमाप्रार्थी छौं ।
नेपालको हङकङ चाइनासँग अन्तराष्ट्रिय मैत्रीपूर्ण खेल चैत्र १२ गते हुने तालिका रहेको थियो ।
