नेपाल विद्युत प्राधिकरण धनगढीले लामो समयदेखि विद्युत महसुल नतिर्ने उपभोक्ताको विद्युत् आपूर्ति काट्न थालेको छ ।

प्राधिकरण धनगढी वितरण केन्द्रले पटक–पटक सम्झाउँदा पनि विद्युत् महसुल तिर्न नमान्ने सरकारी कार्यालय र व्यक्तिगत उपभोक्ताको विद्युत् लाइन काट्न थालेको छ । प्राधिकरणले समयमै विद्युत् महसुल नतिरेको भन्दै धनगढी र अत्तरियाका २५३ उपभोक्ताको विद्युत् तार काटेको हो ।

लामो समयदेखि विद्युत् महसुल नतिर्ने उपभोक्ताको बक्यौता रकम रु १५ करोड ३४ लाख रहेको छ । धनगढी वितरण केन्द्रका प्रमुख मिथिलेशकुमार गोयलका अनुसार १८० उपभोक्ताले विद्युत् आपूर्ति काटेर महसुल तिरेका छन् ।

पछिल्लो एक महिनामा मात्रै उपभोक्ताबाट ७ करोड ८३ लाख रुपैयाँ असुली भएको उनले बताए । धनगढी विद्युत वितरण केन्द्रले मालपोत कार्यालय, नापी कार्यालय, सडक कार्यालयलगायत सातवटा सरकारी कार्यालयको लाइन काटेको छ । कम्तिमा सात सरकारी कार्यालयले विद्युत महसुलको रु ६ लाख २ हजार ६०७ तिर्न बाँकी रहेको धनगढी वितरण केन्द्रको तथ्यांक छ ।

लाइन काटिएका सरकारी कार्यालयबाट १ लाख ४८ हजार ६ सय ४० मात्रै असुली भएको वितरण केन्द्र प्रमुख गोयलले बताए ।

धनगढी वितरण केन्द्रअन्तर्गत ७९ हजारभन्दा बढी उपभोक्ता रहेका छन् । कार्यालयले समयमा विद्युत महसुल नतिर्ने विद्युत् उपभोक्तालाई विद्युत् आपूर्ति अवरुद्ध गर्ने जनाएको छ ।

विद्युत् नियमावलीअनुसार मिटर रिडिङ गरेको ६० दिनपछि पनि बक्यौता नतिरे विद्युत् आपूर्ति बन्द हुने व्यवस्था छ । विद्युत् आपूर्ति अवरुद्ध भएको ६ महिनासम्मको बक्यौता नतिर्ने उपभोक्तालाई कालोसूचीमा राखेर असुली प्रक्रिया अगाडि बढाउने व्यवस्था छ ।