केन्द्रीय अनुसन्धान ब्यूरो (सिआइबी) को टोलीले सोमबार काठमाडौंको डिल्लीबजारस्थित प्लाटिनम कलेजका अध्यक्ष जीवनकुमार गुरुङलाई सुन तस्करीमा संलग्न भएको आरोपमा पक्राउ गरेको छ ।

गुरुङलाई सामाखुसीबाट पक्राउ गरिएको सिआइबीका प्रवक्ता तथा एसपी होविन्द्र बोगटीले जानकारी दिए । अनुसन्धानका क्रममा खुलेको तथ्यका अनुसार उनी १४ किलो सुन तस्करी प्रकरणका मुख्य योजनाकार हुन् ।

दुबईबाट १४ किलो सुन तस्करी गरेको अभियोगमा पक्राउ पुर्जी जारी भएपछि गुरुङ फरार रहेको एसपी बोगटीले बताए ।

उनलाई सोमबार प्रहरीले पक्राउ गरेको र भन्सार विभागमा बुझाइएको प्रहरीले जानकारी दिएको छ ।