सोमबार सरकारले विद्युत् प्राधिकरणका कार्यकारी निर्देशक कुलमान घिसिङलाई पदबाट बर्खास्त गरेको बिरोधमा चौतर्फी विरोध सुरु भएको छ । मंगलबार माइतीघर मण्डलामा विरोध प्रदर्शन गर्दै ‘कता हिँडेको, बिजुली मारेर, कुलमान फालेर’ नारा लगाएका छन् ।यस्तै प्रमुख प्रतिपक्ष दल नेकपा (माओवादी केन्द्र) ले पनि विरोध गरेको छ । अध्यक्ष पुष्पकमल दाहालले नै सरकारले गलत गरेको बताएका छन् ।

यसअघि आज विहान कुलमानलाई हटाएको विरोधमा काठमाडौंको प्रदर्शनीमार्गमा विद्यार्थीहरुले ऊर्जामन्त्री दीपक खड्काको पुत्ला जलाएका छन् । एकीकृत समाजवादी निकट विद्यार्थी संगठन अनेरास्ववियूले प्रदर्शनीमार्गस्थित विश्वभाषा क्याम्पस अगाडि प्रदर्शन गर्दै पुत्ला जलाएका हुन् ।
कुलमानको चारवर्षे कार्यकाल आउँदो साउनमा सकिदै थियो । तर, त्यो भन्दा चार महिना अघि नै उनलाई सरकारले हटाउने निर्णय गरेसँगै चौतर्फी विरोध सुरु भएको हो ।

सरकारले चार महिनाअगावै कुलमानलाई बर्खास्त गरेर हितेन्द्रदेव शाक्य नियुक्त गरेको छ । कुलमानलाई हटाएकोमा सत्तामा रहेको दल नेपाली कांग्रेसले पनि विरोध गरेको छ ।