चालू आर्थिक वर्षको निर्जीवन बीमा कम्पनीहरूको व्यवसाय मङ्सिरको तुलनामा पुसमा २३ प्रतिशतले वृद्धि भएको छ । आर्थिक मन्दीबाट देश विस्तारै उक्लिन्दै गर्दा देशको आन्तरिक आर्थिक गतिविधिमा आएको सुधारसँगै बीमा कम्पनीहरूको व्यवसायमा पनि वृद्धि देखिएको हो ।

नेपाल बीमा प्राधिकरणले प्रकाशित गरेको तथ्यांकअनुसार चालू आ.व.को मङ्सिरमा निर्जीवन बीमा कम्पनीहरूले २ अर्ब ९९ करोड रुपैयाँ बीमा शुल्क संकलन गरेकोमा पुसमा यो आँकडा बढेर ३ अर्ब ६७ करोड रुपैयाँ पुगेको छ । यो वृद्धि २२ दशमलव ८८ प्रतिशतले हो । 

हाल १४ ओटा कम्पनीले निर्जीवन बीमा सेवा दिँदै आएको मा पुसमा सबैभन्दा बढी शिखर इस्योरेन्सले ८७ करोड ३१ लाख रुपैयाँ बीमाशुल्क संकलन गर्दा सबैभन्दा कम राष्ट्रिय बीमा कम्पनीले ६ करोड ७२ लाख रुपैयाँ मात्र संकलन गरेको छ । 

कम्पनीहरूको बीमाशुल्क संकलन वृद्धि भए पनि पुसमा जारी बीमालेखको संख्या भने घटेको छ । मङ्सिरमा उनीहरूले कुल २ लाख ७२ हजार ३८५ ओटा बीमालेख जारी गरेकोमा पुसमा २ लाख ५९ हजार ८१५ मात्रै जारी गरेको प्राधिकरणले जनाएको छ । 

गत पुससम्म निर्जीवन बीमा कम्पनीहरूले १४ लाख २१ हजार बीमालेख जारी गरी १९ अर्ब ३९ करोड बीमाशुल्क संकलन गरेका छन् । 

विप्रेषण आप्रवाहमा आएको सुधार, बैंक, वित्तीय संस्थामा अधिक तरलता, बैंकहरूले ब्याजदर घटाउँदै कर्जा प्रवाहमा जोड, दिनुले निर्जीवन बीमा कम्पनीको व्यवसायमा सकारात्मक प्रभाव देखिएको हो ।