काठमाडौं । नेपालमा हाल मनसुनी वायुसँगै पश्चिमी वायुको आंशिक प्रभाव कायम रहेको मौसम पूर्वानुमान महाशाखाले जनाएको छ। भारतको उत्तर महाराष्ट्र र छत्तिसगढ आसपास केन्द्रित बलियो न्यूनचापीय प्रणाली उत्तर–पश्चिमतर्फ सर्ने क्रममा रहेको र आगामी १२ घण्टामा क्रमशः कमजोर हुँदै जाने अनुमान गरिएको छ।
उक्त मौसमी प्रणालीको प्रभावका कारण अहिले देशका अधिकांश भूभागमा आकाशमा बादल लागेको छ। गण्डकी, लुम्बिनी, कर्णाली र सुदूरपश्चिम प्रदेशका धेरै स्थानमा वर्षा भइरहेको छ। बागमती प्रदेशका केही तथा कोशी र मधेस प्रदेशका थोरै स्थानमा पनि हल्कादेखि मध्यम वर्षा भइरहेको महाशाखाले जनाएको छ।
दिउँसोको मौसम
आज दिउँसो देशभरको मौसम मुख्यतः बदली रहने अनुमान छ। गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रमा धेरै स्थानमा तथा कोशी र बागमती प्रदेशका हिमाली–पहाडी भूभागका धेरै स्थानमा मेघगर्जन र चट्याङसहित मध्यम वर्षा हुनसक्नेछ।
लुम्बिनी र सुदूरपश्चिमका तराई क्षेत्रमा अधिकांश स्थानमा तथा मधेससहित कोशी, बागमती र गण्डकी प्रदेशका तराई भूभागका केही स्थानमा पनि चट्याङसहित मध्यम वर्षाको सम्भावना रहेको छ।
गण्डकी, लुम्बिनी, कर्णाली र सुदूरपश्चिम प्रदेशका केही स्थानमा भारीदेखि धेरै भारी वर्षा हुनसक्ने देखिएको छ। त्यस्तै, कोशी र बागमती प्रदेशका एक–दुई स्थानमा भारी वर्षाको सम्भावना छ।
मधेस तथा कोशी, बागमती, गण्डकी र लुम्बिनी प्रदेशका तराई क्षेत्रमा केही स्थानमा हावाहुरी चल्न सक्ने भएकाले आवश्यक सतर्कता अपनाउनुपर्ने देखिन्छ।
रातिको मौसम
आज राति बागमती, गण्डकी, लुम्बिनी, कर्णाली र सुदूरपश्चिम प्रदेशमा अधिकांश भूभागमा बदली रहनेछ। कोशी र मधेस प्रदेशमा भने सामान्यतया बादल लाग्ने पूर्वानुमान गरिएको छ।
राति गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भूभागका अधिकांश स्थानमा मेघगर्जन र चट्याङसहित मध्यम वर्षा हुनसक्नेछ। बागमती प्रदेशका हिमाली तथा पहाडी क्षेत्रका धेरै स्थानमा र कोशी प्रदेशका हिमाली तथा पहाडी भूभागका केही स्थानमा पनि वर्षाको सम्भावना छ।
गण्डकी, लुम्बिनी र सुदूरपश्चिम प्रदेशका तराई क्षेत्रका अधिकांश स्थानमा तथा बागमती प्रदेशका तराई भूभागका धेरै स्थानमा वर्षा हुनसक्नेछ। मधेस र कोशी प्रदेशका तराई क्षेत्रमा भने केही स्थानमा चट्याङसहित मध्यम वर्षाको सम्भावना रहेको छ।
रातिको समयमा बागमती, गण्डकी, लुम्बिनी, कर्णाली र सुदूरपश्चिम प्रदेशका केही स्थानमा तथा मधेस प्रदेशका एक–दुई स्थानमा भारीदेखि धेरै भारी वर्षा हुनसक्ने महाशाखाको अनुमान छ।
यसैगरी, लुम्बिनी र सुदूरपश्चिम प्रदेशका एक–दुई स्थानमा अति भारी वर्षा हुनसक्ने सम्भावना रहेको छ। कोशी, बागमती, गण्डकी र लुम्बिनी प्रदेशका तराई क्षेत्रमा केही स्थानमा हावाहुरीसमेत चल्न सक्ने पूर्वानुमान गरिएको छ।
वर्षासँगै चट्याङ, हावाहुरी तथा भारी वर्षाको सम्भावना रहेकाले सम्बन्धित क्षेत्रका नागरिकलाई आवश्यक सावधानी अपनाउन मौसमविद्हरूले सुझाव दिएका छन्।
