रास्वपाका मन्त्रीहरुले आज राजीनामा दिने, नयाँ गठबन्धन सरकारमा सहभागी नहुने निर्णय
मेरो आर्थिक
असार २० गते २०८१
समयः ८:०३ am
![रास्वपाका मन्त्रीहरुले आज राजीनामा दिने, नयाँ गठबन्धन सरकारमा सहभागी नहुने निर्णय](https://meroaarthik.com/wp-content/uploads/2024/07/raswapa-mantri-regignation.jpg)
राष्ट्रिय स्वतन्त्र पार्टी (रास्वपा) का मन्त्रीहरुले आज राजीनामा दिँने भएका छन् । आज बिहान ८ बजे सामुहिक राजीनामा दिने रास्वपाका प्रमुख सचेतक सन्तोष परियारले जानकारी दिएका छन् ।
बुधबार आफ्नो पाटीैको करीब १२ घण्टा लामो बैठक बसेको रास्वपाले आज बिहान प्रधानमन्त्री पुष्पकमल दाहाल प्रचण्डलाई भेटेर मन्त्रीहरुले राजीनामा बुझाउने जानकारी दिएको हो । मंगलबार बसेको रास्वपाको पदाधिकारी बैठकले कांग्रेस–एमाले गठबन्धनको सरकारमा सहभागी नहुने निर्णय गरेको थियो ।
नेकपा एमाले नेकपा माओवादी केन्द्रसँगको सत्ता समीकरण तोडेर नेपाली कांग्रेससँग गठबन्धन गरेपछि सरकार अल्पमतमा परेको छ । प्रचण्ड नेतृत्वको सरकार ढल्ने निश्चित भएपछि रास्वपाका मन्त्रीहरुले पनि सरकार छाड्न लागेको बुझिएको छ।
हाल सरकारमा रास्वपाका सभापति रवि लामिछाने उपप्रधानमन्त्री तथा गृहमन्त्री छन् । यसैगरी उपसभापति डोलप्रसाद अर्याल श्रम तथा रोजगार मन्त्री, सुमना श्रेष्ठ शिक्षा मन्त्री र विराजभक्त श्रेष्ठ युवा तथा खेलकुद मन्त्री छन् ।
यता बुधबार नैं नेकपा एमालेले सरकारलाई दिएको समर्थन फिर्ता लिनुका साथै मन्त्रीहरुले पनि सामूहिक राजीनामा बुझाएका थिए ।