विद्यादेवी भण्डारीले सुरक्षाबाहेक अन्य सुबिधा नलिने
मेरो आर्थिक
•
असार १८ गते २०८२
काठमाडौँ । नेकपा एमालेको सक्रिय राजनीतिमा पुनरागमन गरेकी पूर्वराष्ट्रपति विद्यादेवी भण्डारीले पूर्वराष्ट्र प्रमुखका लागि सरकारले उपलब्ध गराउदै आएको सुबिधा नलिने भएकी छन् ।
भण्डारीले पूर्वराष्ट्र प्रमुखका लागि सरकारले दिदै आएको सुरक्षाबाहेक कुनै पनि सेवासुविधा नलिने व्यहोराको पत्र गृहमन्त्रालयमा पठाएकी हुन् ।
पत्रमा पूर्वराष्ट्रपति भण्डारीले आजकै मितिदेखि लागू हुनेगरी सुरक्षाबाहेकका कुनै पनि सेवासुविधा नलिने उल्लेख छ । पूर्वराष्ट्रपति भण्डारीले आफ्नो कार्यकाल पूरा गरी सेवानिवृत्त भएपछि पूर्वराष्ट्र प्रमुखका हैसियतले सरकारले उपलब्ध गराउने सेवासुवधा लिँदै आएकी थिइन् ।
भण्डारी २०७२ कात्तिक ११ गते राष्ट्रपति पदमा पहिलोपटक निर्वाचित भएकी थिइन् । त्यसपछि दोस्रो कार्यकालका लागि २०७४ साल फागुन २९ गते उनी निर्वाचित भइन् । उनको कार्यकाल २०७९ फागुन २९ गते नयाँ राष्ट्रपतिको रुपमा रामचन्द्र पौडेलले शपथ लिएसँगै सकिएको थियो ।
