सुनसरी । पाँचथरको तमोर करिडोर सडकखण्डमा बलेरो पिकअप दुर्घटना हुँदा पाँच जनाको मृत्यु भएको छ ।
कोशी प्रदेश प्रहरीका अनुसार शनिबार दिउँसो पाँचथरबाट धरानतर्फ यात्रुसहित मे १ ज ३०५५ नम्बरको बोलेरो जीप तमोर नदी किनारमा करिब ४०० मिटर तल खसेको थियो ।
सो दुर्घटनामा पाँच जनाको घटनास्थलमै मृत्यु भएको पुष्टि गरिएको छ । मृत्यु हुनेमा २ महिला र ३ पुरुषको रहेका छन् भने उनीहरूको पहिचान खुल्न बाँकी रहेको प्रहरीले जनाएको छ ।
हालसम्म सात जना घाइतेलाई उद्धार गरिएको छ, जसमा छ जनालाई धरानस्थित बिपी कोइराला स्वास्थ्य विज्ञान प्रतिष्ठान लगिएको छ भने एक जनालाई फिदिम अस्पताल, पाँचथर पठाइएको प्रहरीले जनाएको छ ।
