आज वि.सं. कार्तिक १० गते, २०८०, बिहीबार आश्विन शुक्ल त्रयोदशीका दिन पनि अघिल्लो दिन जस्तै नवदुर्गाको प्रसाद स्वरूप टीका थाप्न र आशीर्वाद लिन मान्यजनका घरमा जाने क्रम चलिरहेको छ । पाँच दिन सम्म चल्ने यो पर्वमा आज चौथो दिन पनि यो क्रम जारी रहेको हो ।

घटस्थापना देखि लगातार नौ दिनसम्म दुर्गा माताको पूजा आराधना गरी देवी विसर्जन गरेपछि विजया दशमीको दिनदेखि शुरु भएको टीका प्रसाद लगाउने र मान्यजनबाट आशीर्वाद लिने क्रम कोजाग्रत पूर्णिमाका दिनसम्म जारी रहन्छ। पश्चिम नेपालका केही जिल्लामा भने विजयादशमीका दिन मात्र दुर्गाको प्रसाद लगाउने र आशीर्वाद थाप्ने प्रचलन रहेको छ।