सुनमा लागु गरिएको कर पुनरावलोकन गर्न अर्थमन्त्री पौडेललाई च्याम्बरको ध्यानाकर्षण

काठमाडौं । नेपाल च्याम्बर अफ कमर्शले आर्थिक वर्ष २०८२-८३ को बजेटमार्फत सुन र सुनका गहनामा लागु गरिएको २ प्रतिशत विलासिता कर र हिरा रत्न जडित गहनामा लागु गरिएको १३ प्रतिशत भ्याटको विषय पुनरावलोकन गर्न अर्थमन्त्री विष्णु प्रसाद पौडेलको ध्यानाकर्षण गराएको छ । 

आइतबार च्याम्बरले सुनमा प्रस्ताव गरिएको २ प्रतिशत विलासिता कर र हिरा लगायत बहुमूल्य पत्थरमा लगाइएको १३ प्रतिशत मूल्य अभिवृद्धि कर (भ्याट) अव्यवहारिक र उपभोक्तामा समेत गम्भिर असर गर्ने भएकाले पुनरावलोकन गर्न अर्थमन्त्री पौडेलको ध्यानाकर्षण गराएको हो । 

च्याम्बरका अध्यक्ष कमलेश कुमार अग्रवाल नेतृत्वको पदाधिकारी टोलीले अर्थमन्त्री पौडेलसमक्ष बजेटमा उल्लेखित विलासिता कर र भ्याट पुनरावलोकनको व्यवस्था वर्तमान आर्थिक अवस्थाको प्रतिकुल हुने बताएको छ । 

सरकारको कर नीतिले नीतिले सुन चाँदी तथा रत्न आभूषणको व्यवसाय नै संचालन गर्न नसकिने र र यो क्षेत्रमा लाखौं जनशक्तिले रोजगारी समेत गुमाउने अवस्था आएकाले सरकारको निर्णय पुनरावलोकन गर्न अध्यक्ष अग्रवालले अर्थमन्त्री पौडेलको ध्यानाकर्षण गराए । 

च्याम्बर पदाधिकारीहरुसँगको भेटका क्रममा अर्थमन्त्री पौडेलले चेम्बर अफ कमर्सले दिएको सुझावलाई आफूले गम्भिरताका साथ लिने प्रतिवद्धता जनाए । उनले सरोकारवाला निकायसँग छलफल गरेर समस्या समाधान गर्ने बताए ।