दुवै सभाको संयुक्त बैठकमा अर्थमन्त्रीबाट बजेट प्रस्तुत हुने, बजेटको आकार तय

आज जेठको १५ गते नेपाल सरकारले आगामी आर्थिक वर्ष ०८१/८२ को राजस्व र व्ययको वार्षिक अनुमान (बजेट) आज संघीय संसद्मा प्रस्तुत गर्ने कार्यक्रम तय गरेको छ । बजेट प्रत्येक वर्ष जेठको १५ गते संघीय संसद्मा पेस गर्नुपर्ने संवैधानिक व्यवस्था छ ।

बजेट वक्तव्यका लागि प्रतिनिधिसभा र राष्ट्रिय सभाको संयुक्त बैठक दिउँसो १ बजे आह्वान गरिएको छ । अर्थमन्त्री वर्षमान पुनले बजेट वक्तव्य प्रस्तुत गर्नेछन् । बजेटको आकार १९ खर्ब हाराहारी हुने अर्थ मन्त्रालय स्रोतले बताएको छ ।

केही दिनअघि माओवादी संसदीय दलको बैठकमा प्रधानमन्त्री पुष्पकमल दाहाल प्रचण्डले १९ खर्ब हाराहारीको बजेट ल्याउने तयारी रहेको जानकारी गराएका थिए । यद्यपि, राष्ट्रिय योजना आयोगका उपाध्यक्ष डा। मीनबहादुर श्रेष्ठको संयोजकत्वमा राष्ट्रिय स्रोत अनुमान समितिले १८ खर्बको बजेट सिलिङ अर्थ मन्त्रालयलाई दिएको थियो । ‘२९ माघमा बसेको राष्ट्रिय स्रोत अनुमान समितिको बैठकले १८ खर्ब रुपैयाँ सिलिङ तोकेको थियो । तर, स्रोत र खर्चको अनुमान फागुनदेखि वैशाखसम्म सुधार भएको पाएपछि सिलिङ पुनः संशोधन गरी १९ खर्ब ४९ अर्ब तोकिएको हो,’ स्रोतले भन्यो ।

संविधानको धारा ११९ मा अर्थमन्त्रीले संघीय संसद्का दुवै सदनको संयुक्त बैठकमा राजस्वको अनुमान, संघीय सञ्चित कोषमाथि व्ययभार हुने आवश्यक रकमहरू र संघीय विनियोजन ऐनबमोजिम व्यय हुने आवश्यक रकमहरू खुलाई वार्षिक अनुमान पेस गर्नुपर्ने व्यवस्था छ । साथै, वार्षिक अनुमान पेस गर्दा अघिल्लो आर्थिक वर्षमा प्रत्येक मन्त्रालयलाई छुट्याइएको खर्चको रकम र त्यस्तो खर्चअनुसारको लक्ष्य हासिल भयो वा भएन, त्यसको विवरण पनि साथै पेस गर्नुपर्ने संवैधानिक व्यवस्था छ । संघीय संसद् सचिवालयका प्रवक्ता एकराम गिरीले १५ जेठमा संसद्मा बजेट ल्याउनुपर्ने संवैधानिक प्रबन्धअनुसार मंगलबार दुवै सभाको संयुक्त बैठकमा अर्थमन्त्रीबाट बजेट प्रस्तुत हुने बताए ।