Skip to content
logo
असार ५ गते २०८१ समयः

राष्ट्रिय प्रजातन्त्र दिवस भव्यताका साथ मनाउने तयारीमा सरकार

मेरो आर्थिक
मेरो आर्थिक
माघ २६ गते २०८०
राष्ट्रिय प्रजातन्त्र दिवस भव्यताका साथ मनाउने तयारीमा सरकार

सरकारले राष्ट्रिय प्रजातन्त्र दिवस भव्यताका साथ मनाउने निर्णय गरेको छ ।

प्रधानमन्त्री पुष्पकमल दाहालको अध्यक्षतामा शुक्रबार सिंहदरबारमा बसेको राष्ट्रिय प्रजातन्त्र दिवस मूल कार्यक्रम समितिको बैठकले यही फागुन ६, ७ र ८ गते विभिन्न कार्यक्रम गरी मनाउने निर्णय गरेको हो ।

बैठकले राष्ट्रिय प्रजातन्त्र दिवस केन्द्रित जनचेतनामूलक कार्यक्रमलाई विशेष टक शो, प्यानल छलफल र रेडियो नाटकको रूपमा डिजाइन गरी फागुन ६ गते प्रसारण गर्न सञ्चारमाध्यमलाई अनुरोध गर्ने निर्णय गरेको छ ।

त्यसैगरी राष्ट्रिय प्रिन्ट मिडिया हाउसहरूलाई लोकतन्त्रका बहुआयामिक आयामहरूलाई उजागर गर्ने विशेष प्रकाशन/स्मारिका र विभिन्न लेखहरूको सङ्कलन प्रकाशन गर्न अनुरोध गरिएको छ।

प्रजातन्त्र दिवसको पूर्वसन्ध्यामा सबै सरकारी निकाय, संघसंस्थाका छत, बरान्दा र परिसरमा तोकिएको आकारको राष्ट्रिय झण्डा फहराइनेछ । त्यस्तै साँझ मण्डल, चोक र घरघरमा दीप प्रज्वलन गरिने छ ।

सरकारको निर्णयअनुसार सबै जिल्लामा सरकारी तथा गैरसरकारी संघसंस्थाको सहयोगमा रक्तदान शिविर आयोजना गरिने र अपाङ्गता भएका विद्यार्थीलाई जिल्लास्तरका विद्यालयमा शैक्षिक तथा खेलकुद सामग्री वितरण गरिने भएको छ ।

फागुन ७ गते नेपाली सेनाले सूर्योदयमा तुरही बजाउने र सैनिक मञ्च टुँडिखेलमा तोप र राइफल प्रहार गर्ने छ । रिङरोड क्षेत्रमा हेलिकप्टरबाट ‘राष्ट्रिय प्रजातन्त्र दिवस, २०८०’ अंकित विशाल ब्यानर प्रदर्शन गरिनेछ। त्यसैगरी सैनिक मञ्च टुँडिखेलमा आयोजित हेलिकप्टरबाट पुष्पवृष्टि र झण्डा प्रदर्शन गरिने छ ।

राष्ट्रिय प्रजातन्त्र दिवस, २०८० को औपचारिक कार्यक्रम सैनिक मञ्च टुँडिखेलमा आयोजना हुनेछ जहाँ निर्वाचित जनप्रतिनिधि, निजामती कर्मचारी, सुरक्षाकर्मी, सार्वजनिक निकाय तथा सामुदायिक संघसंस्थाका पदाधिकारी, शैक्षिक तथा शैक्षिक संस्था र नागरिकका विशिष्ट व्यक्तिहरुको उपस्थिति रहेको छ । समाज र सर्वसाधारणलाई आमन्त्रित गरिनेछ। त्यसैगरी सरकारले राष्ट्रिय प्रजातन्त्र दिवसको अवसरमा प्रदेश र जिल्ला स्तरमा देशभर विविध कार्यक्रम गर्ने निर्णय गरेको छ ।

Add a new comment