पोखरा विमानस्थल निर्माणमा भ्रष्टाचार भएको आशंका गरिएको छ । कतिपयले यसलाई नेपालमा अहिलेसम्मकै सबैभन्दा ठूलो भ्रष्टाचार भएको पनि तर्क गर्छन् ।

अख्तियार दुरुपयोग अनुसन्धान आयोगको टोलीले २०२३ नोभेम्बरमा नेपाल नागरिक उड्डयन प्राधिकरण (क्यान)सँग पोखरा क्षेत्रीय अन्तर्राष्ट्रिय विमानस्थल निर्माणसम्बन्धी कागजात मागेको थियो तर पटक–पटक आग्रह गर्दा पनि क्यानका महानिर्देशक प्रदीप अधिकारीले अनुरोध गरिएका कागजातहरू पेश गर्न मानेनन् । जसपश्चात अख्तियारले उनलाई कार्यालयमा बोलाएर स्पष्टीकरण मागेको थियो ।

डीआईजी, प्रहरी महाशाखाका प्रमुखको उपस्थितिमा अख्तियारका प्रमुख प्रेमकुमार राईले अधिकारीलाई आवश्यक कागजात उपलब्ध गराउन भनेका थिए ।

‘सहयोग नगर्ने हो भने कागजपत्र जुटाउन अन्य माध्यम अवलम्बन गर्छौं,’ राईले अधिकारीलाई भने ।

छलफलका क्रममा राईले कागजपत्र लिन वैकल्पिक उपाय सुझाएपछि अधिकारीले प्रहरी महाशाखा प्रमुखतर्फ इशारा गरेको स्रोतले जनाएको छ । त्यही बेला क्यानले पोखरा विमानस्थल निर्माण प्रक्रियाको कागजात र विवरण उपलब्ध गराएको थियो ।

अनुमान सहि हो कि होइन भन्ने बुझ्न अनलाइनखबरले महालेखा परीक्षकको कार्यालयका एक लेखा परीक्षक, पोखरा विमानस्थल आयोजनामा ​​काम गर्ने इन्जिनियर र नाम नखुलाउने अख्तियारका प्राविधिकसँग कुरा गरेको थियो । विमानस्थल निर्माणका क्रममा देखिएको अनियमितता अहिलेसम्मकै सबैभन्दा बढी हुन सक्ने तीनवटै स्रोत सहमत छन् ।