बुधबार शपथ ग्रहण गरेर उपप्रधानमन्त्री तथा गृहमन्त्री पदमा नियुक्त भएका रवि लामिछानेले अघिल्लो ३४ दिने कार्यकालमा गर्न बाँकी रहेका कामहरु अब क्रमश गर्दै जानेे र देशलाई समृद्धिको बाटोमा लैजाने प्रतिबद्धता जाहेर गरेका छन् ।

उनले कुनै पनि अनुसन्धानलाई प्रभावित पार्ने ढङ्गबाट आफ्नो पार्टीले काम नगर्ने बताएका छन् । गृहमन्त्रीको जिम्मेवारी सम्हाले लगत्तै कर्मचारीहरुलाई निर्देशन दिँदै उनले आफ्ना कुनै पनि कार्यकर्ताले अनुसन्धानलाई प्रभावित पार्न खोजे उनीहरुलाई पनि कानुन अनुसार कारबाही गर्न निर्देशन दिएका छन् ।

अघिल्लो पटक ३४ दिनको कार्यकालमा तस्करी नियन्त्रणमा आफूले काम गरेको भन्दै उनले अहिले पनि तस्करी नियन्त्रणमा काम गर्ने उनले प्रतिवद्धता जनाएका छन् ।

उनले अघिल्लो कार्यकालको तुलनामा अहिले आफू दृढ भएर आएको उनले बताएका छन् । आफ्नो नाम लिएर वा आफूसँग खिचेको फोटो देखाउँदै सरुवा र बढुवाको चिर्कटो बोकेर कोही आएमा जानकारी दिन भन्दै उनले त्यस्तो व्यक्तिलाई सिंहदरबार प्रवेशमै रोक लगाउने उनले बताए ।

उपप्रधानमन्त्री लामिछानेले सरकारी जग्गा हडप्नेहरुलाई कारबाही गर्ने र सरकारी सम्पत्ति सरकारकै नाममा ल्याउने पहिलो निर्णय पनि गरेका छन् । त्यसैगरि, उनले न्याय माग्नलाई मन्त्रीनै भेट्ने चलनको अन्त्य गर्ने घोषणा पनि गरेका छन् ।

उनले मिटरव्याजी जस्ता पीडितहरु वा अरु कुनै पीडित न्याय माग्न काठमाडौंसम्म आउन नपर्ने गरी काम गर्ने बताए । लघुवित्तका ऋणी र मिटरब्याज पीडितले काठमाडौंमा आएर नियमित जसो प्रदर्शन गर्दै आएका छन् ।

उनले नागरिकलाई सुरक्षित छु भन्ने अनुभूतिमा काम गर्ने पनि उनले बताए । उनले कुनै पनि व्यापारीले व्यापर गर्न पाइनँ, सुरक्षा भएन भनेर गुनासो गर्ने ठाउँ नरहने गरी काम गर्नु पर्ने बताएका छन् । शहर २४ सै घण्टा खुल्ने वातावरण बनाउनु पर्नेमा पनि जोड दिने उनले बताए ।