अर्थमन्त्रालयद्धारा कार्ययोजना पेश गर्न तालुकअड्डालाई निर्देशन
मेरो आर्थिक
•
फागुन २९ गते २०८०
वर्षमान पुन अर्थमन्त्रीमा नियुक्त भएपछि देशको अर्थतन्त्र सुधार गर्न ठोस कदमहरु चालिने भएको छ । अर्थमन्त्रालयले पूँजी बजारको विकासको लागि कार्ययोजना पेश गर्न तालुकअड्डालाई निर्देशन दिएको छ। हिजो एक पत्र मार्फत अर्थले यस्तो निर्देशन दिएको हो।
पूँजी बजारमा देखिएका समस्या समाधान एवं त्यसको विकास र विस्तारका लागि सरोकारवालसंग राय सुझाव लिएर एक हप्ताभित्र कार्ययोजना पेश गर्नलाई उक्त पत्रमा भनिएको छ।
मन्त्रालयले नेपाल धितोपत्र बोर्ड, नेपाल स्टक एक्सचेन्ज र सिडीएस एण्ड क्लियरिङ्ग लिमिटेडलाई पूँजीबजारका सरोकारवालासंग छलफल गरेर एक हप्ताभित्र पूँजी बजारमा देखिएका समस्या समाधान एवं त्यसको विकास र विस्तारका लागि कार्य योजना पेश गर्न निर्देशन दिएको हो।
अर्थमन्त्री, अर्थ सचिव र राजश्व सचिवलाई निर्देशनको बोधार्थ गरिएको छ। सत्ता समीकरण बदलिएपछि बनेको नयाँ गठबन्धनका नयाँ अर्थमन्त्री बनेका बर्षमान पुनको यो कामलाई शेयरबजारका लगानीकर्ताले प्रशंसा गरेका छन्।
