वाणिज्य बैंकहरुबाट प्रवाह हुने सेयर धितो कर्जा ३५ प्रतिशतले बढेको नेपाल राष्ट्र बैंकले जनाएको छ । राष्ट्र बैंकको चालु आ.व.को कात्तिकसम्मको तथ्यांक हेर्दा गत वर्षको सोही अवधिको तुलनामा सेयर कर्जा २२ अर्ब ३१ करोड ११ लाख रुपैयाँले बढेको हो ।

चालु आवको कात्तिकसम्ममा वाणिज्य बैंकहरुले ८५ अर्ब ९१ करोड १४ लाख रुपैयाँ बराबरको सेयर कर्जा प्रवाह गरेका केन्द्रिय बैंकले जनाएको छ । गत आवको कात्तिकसम्म यस प्रकारको कर्जा ६३ अर्ब ६० करोड प्रवाह भएको थियो । जुन ३५.०८ प्रतिशतले बढी हो ।
कात्तिकसम्म आइपुग्दा बैंक तथा वित्तीय संस्थाहरुले समग्रमा १ खर्ब ७ अर्ब ७६ करोड रुपैयाँ सेयर कर्जा प्रवाह गरेको केन्द्रिय बैंकको तथ्यांकले देखाएको छ । ४ महिनामा मात्रै वाणिज्य बैंकहरुले प्रवाह गरेको सेयर कर्जा २५ प्रतिशतले बढेको छ । गत असारसम्म ६८ अर्ब ६२ करोड ४४ लाख सेयर कर्जा प्रवाह भएकोमा कात्तिकसम्म आइपुग्दा ८५ अर्ब ९१ करोड १४ लाख पुगेको हो ।
यता ४ महिनाको अवधिमा बैंकहरुले १७ अर्ब २८ करोड सेयर कर्जा प्रवाह गरेका छन् । असोजको तुलनामा भने कात्तिकमा वाणिज्य बैंकहरुको सेयर कर्जा १ अर्ब ७० करोड १० लाख रुपैयाँले बढेको छ । समग्र बैंक–वित्तीय संस्थाले १ अर्ब ९४ करोड ३ लाख रुपैयाँ सेयरमा ऋण लगानी गरेका छन् ।

चालु आर्थिक वर्षको मौद्रिक नीतिमार्फत राष्ट्र बैंकले संस्थागत लगानीकर्तालाई लाग्दै आएको २० करोडको सीमा खारेज गरेको छ । यो व्यवस्थाले पनि ठूला लगानीकर्ता उत्साहित भएकाले सेयर कर्जा बढेको बिश्लेषकहरुको भनाइ छ । सेयर कर्जामा व्यक्तिगत लगानीकर्ताले कर्जा लिन पाउने अधिकतम १५ करोडको सीमा भने यथावत छ । सेयरलगानीकर्ताहरुले यसलाइ हटाउनु पर्ने माग राख्दै आएका छन् ।

योसँगै गत आर्थिक वर्षको कात्तिकको तुलनामा चालु आवको कात्तिकमा व्यक्तिगत ओभरड्राफ्ट कर्जा ३.४८, चालु पुँजी कर्जा ८.५९ र विपन्न वर्ग कर्जा ५.६१ प्रतिशतले घटेको राष्ट्र बैंकले जनाएको छ । समीक्षा अवधिमा सबैभन्दा बढी चालु पुँजी कर्जा ७० अर्ब ९२ करोडले घटेको छ । विपन्न वर्ग कर्जा १५ अर्ब १७ करोड तथा ओभरड्राफ्ट कर्जा ३ अर्ब १९ करोडले घटेको छ ।

समीक्षा अवधिमा सेयर कर्जा, आवधिक कर्जा, आयात कर्जा, आवासीय घर कर्जा, हायर पर्चेज, क्यास क्रेडिट, रियल स्टेट, बिल्स खरिद र अन्य प्रकारका कर्जाहरु भने बढेका छन् ।