अझै पनि २०.२७ प्रतिशत जनता गरिबीको रेखामुनि रहेको तथ्याङ्क
मेरो आर्थिक
फागुन ३ गते २०८०
समयः ८:३० am
राष्ट्रिय तथ्याङ्क कार्यालय (एनएसओ) ले नेपालमा अझै पनि २० दशमलव २७ प्रतिशत जनता गरिबीको रेखामुनि रहेको जनाएको छ ।
नेपाल जीवनस्तर सर्वेक्षण (NLSS) २०२३/२४ फेब्रुअरी १२ मा सार्वजनिक गर्दै NSO ले २०१५ को गोरखा भूकम्प र कोभिड–१९ महामारीका कारण देशको गरिबी दर अपेक्षाअनुरूप घट्न नसकेको बताएको छ ।
एनएलएसएसको प्रतिवेदनअनुसार सहरको तुलनामा ग्रामीण क्षेत्रमा गरिबीको दर तीव्र छ, सहरमा गरिबीको दर १८.३४ प्रतिशत रहेको छ भने ग्रामीण क्षेत्रमा २४.६६ प्रतिशत रहेको छ ।
कार्यक्रममा राष्ट्रिय योजना आयोगका उपाध्यक्ष डा मीनबहादुर श्रेष्ठले महामारी, प्राकृतिक प्रकोपलगायतका कारणले गरिबी निवारणमा मुलुकको प्रगति सुस्ताएको तर्क गर्नुभयो ।
सर्वेक्षणअनुसार चार प्रदेशमा गरिबी दरको राष्ट्रिय रेकर्डभन्दा बढी गरिबी दर रहेको छ । सुदूरपश्चिम प्रदेशमा सबैभन्दा बढी ३४.१६ प्रतिशत गरिबी रहेको छ भने कर्णाली प्रदेशमा २६.६९ प्रतिशत, लुम्बिनी प्रदेशमा २४.३५ प्रतिशत र मधेश प्रदेशमा २२.५३ प्रतिशत गरिबी रहेको छ ।
सबैभन्दा कम गरिबी दर गण्डकी प्रदेशमा ११.८८ प्रतिशत रहेको छ भने बागमतीमा १२.५९ प्रतिशत र कोशी प्रदेशमा १७.१९ प्रतिशत रहेको छ ।
Add a new comment
