इलाम । आगामी बैशाख १५ गते शनिवार अर्थात् भोली इलाम र बझाङ्गमा उपनिर्वाचनको तयारी पुरा भएको निर्वाचन आयोगले जनाएको छ । सोही क्रममा उपनिर्वाचन हुने दिन वैशाख १५ गते इलाम जिल्लाभर सवारीका साधन बन्द गर्ने निर्णय भएको हो ।

महत्वका साथ हेरिएको इलाम क्षेत्र २ मा भोली शनिवार हुने उपनिर्वाचनका लागि बिहान ५ देखि साँझ ६ बजेसम्म मेची राजमार्गसहितको यातायात बन्द गर्ने सर्वपक्षीय सर्वदलीय निर्णय भएको हो ।

बैशाख १५ गते मतदानको दिन विहान ५ः०० बजे देखि साँझ ६ः०० बजे सम्म अत्यावश्यक सेवाका र अनुमति प्राप्त सवारी साधन बाहेक इलाम जिल्ला भर मेची राजमार्ग लगायत अन्य सबै सहायक मार्गहरुमा सबै किसिमका सवारी साधनको आवागमन बन्द हुने छन् ।
निर्णय अनुसार छिमेकी जिल्लाहरु झापा¸ मोरङ¸ पाँचथर र ताप्लेजुङका जिल्ला प्रशासन कार्यालयलाई जानकारी गराई व्यवस्थापनमा सहयोग माग गर्ने निर्णय भएको छ ।

मिडिया हाउसको सिफारिसको आधारमा संचारकर्मीहरुलाई मूख्य निर्वाचन अधिकृतको कार्यालयबाट निर्वाचनको दिन सवारी साधन आवागमन अनुमति पत्र उपलब्ध गराउने र अन्य आवश्यक सवारी पास समेत मूख्य निर्वाचन अधिकृतको कार्यालयबाट उपलब्ध गराइने निर्णय भएको छ ।

चुनावको दिन हिंडडुल गर्न नसक्ने गर्भवती महिला¸ साथमा आफ्नै बच्चा बोकेकी महिला¸ किरियापुत्री¸ शारीरिक रुपले अशक्त वा अपाङ्गता भएका व्यक्ति हिंडडुल गर्न नसक्ने जेष्ठ नागरिक लगायतलाई मतदान केन्द्रसम्म आउन र फर्कनको लागि सम्बन्धित सम्बन्धित मतदान केन्द्रबाट सर्वदलीयरसर्वपक्षीय सहमतीका आधारमा सम्बन्धित मतदान अधिकृतबाट सवारी साधनको अनुमति पत्र उपलब्ध गराइने प्रमुख जिल्ला अधिकारी इन्द्रदेव यादवले जानकारी दिएका छन् ।

निर्वाचन (कसुर तथा सजाय) ऐन¸ २०७३ को दफा २४ तथा निर्वाचन आचार संहिता¸ २०७९ को दफा १७ र १८ ले निषेध गरिएका कार्यहरु मतदान कार्य सम्पन्न नभएसम्मका लागि सम्बन्धित सवैले पूर्ण रुपमा पालना गर्न राजनीतिक दल सहमत भएका छन् ।

जिल्ला सुरक्षा समितिका पदाधिकारी सहितको सहभागितामा निर्वाचन कमाण्ड पोष्ट जिल्ला प्रशासन कार्यालयमा राखिने र उक्त कमाण्ड पोष्टमा राजनीतिक दल एवं उम्मेदवारका प्रतिनिधि सहभागी हुन इच्छुक भएमा सहभागी हुन पाउने निर्णय गरिएको छ ।
सोही निर्णय बमोजिम जिल्लाबाट बाहिरीने तथा भित्रिने क्रम तीब्र छ । निर्वाचनामा सहभागी हुन जिल्ला बाहिरबाट मतदाताहरु आउने क्रम जारी छ ।